مستغربين من العنوان..
بس وش اسوي مالي حيلة
عجزت وانا اخور وادور ابحث
عن عطري التائه كنت استخدمه من الثمانينات
وحتى منتصف التسعينات..وبعدها صار فص ملح
وذاب ..وين ذاب مدري؟؟
المهم هذا العطر بحكي لكم حكايته من يوم كنت بالثانوي
طالبة وكان ابوي رحمة الله عليه يوديني للمدرسة كل صباح
وكان يعجبه ريحة هذا العطر..ومن 10 سنوات ابوي مات والعطر اختفى
من 10 سنوات….وانا ابحث عن هالعطر لأن له ذكريات تذكرني بأغلى
مخلوق على وجه الارض رحمة الله عليه..وكل صبح اتعطر واروح الدوام
ومن يوم اشم اي عطر اقول آآآآآآآه مو كل عطر عطر!!واتنكد وينقلب
مزاجي..حتى عيالي لاحظوا .. قالوا يمة انتي لما تصحين بمزاج ولما
نجي نطلع من البيت تعصبين ومزاجك منكد..فما ادري وش اقول لهم
واخلي السبب انهم اخرتونا عن الدوام بسرعة عجلوا….وهم مايدرون
وش بخفايا جوفي….ادري طولت عليكم بس والله من غلاة هالعطر
اني مو قادرة انساه على ان الشركة نزلت له بديل وبنفس الاسم
بس شتان مابين هذا وذاك..المهم بقول لكم اسم عطري التائه
(مست كارتييه)الاسود اللي له قاعدة بارزة من اسفل ماتخليه
يوقف إلا مقلوب على راسه..ادري بتقولون موجود بس انا اقول
شريته الف مرة بأقنع نفسي فيه ولكن!!!!وبعدين اللي موجود لونه شفاف
وريحته حيل خفيفة..هنا بالرياض طلبته طلبية من برا وفعلا جاني قبل 7سنوات
وشريته مع انه ضربني ضرب بالسعر شافني ملهوفة عليه هو سعره 90ريال
تدرون بكم باعه لي؟؟400ريال وعذره ايش انه اساسا جايبة لأميرة كمية كبيرة
وهذا اللي بقى منها وقلت هاته بس هو من ريحة الغالي؟؟؟
والحين اللي تلقى لي هالعطر بدعي لها من قلبي ان الله لايحرمها من غاليها
ولا يفجعها بمن تحب قولوا آآآآمين
والحمدلله الحين لقيت عطر نفس الريحه بالضبط وهو لوف ان وايت من كريد اول ماشميته ذكرت كارتير الاسود على طول
جربيه ان شاءالله يمكن تلقين كارتير فيه
نفس العطر الي ادور عليه وما حصلته ما خليت مكان فالامارات ما سالتهم عنه وقالولي ما يبونه خلاص
وفقدت الامل وصح ما يوقف الا مقلوب ولونه داكن وحجمه صغير
وكل العطور الي نزلت من بعده غير مش نفس الريحه
وهذا العطر عطري انا واختي عطر الطفوله
في اقرب فرصة..وعساي القى البديل
وشكرا ياخت فاميلي على الصورة
وشكرا لكم يالغوالي وعسى الله يرزقكم ولا يفجعكم
أستفدنا منه وجميل