اخواتي عندي مشكله مأرقتني صراحه واعاني منها من بدأت بنتي مرحله الفهم …
هي الحين 5 سنوات
وهي نقل الكلام.. بنتي تنقل كل شي تشوفه لي وتعبت وانا انبها وافهمها ان لا يجوز نقل الكلام لما فيه أذى للناس…
والدليل ما حصل اليوم .. بنتي نقلت كلام من بيت اهل زوجي قالوه عن مزح .. عن والدتي وكان تعليق بسيط عن اهتمام والدتي بالنظافه … وانا متأكده لو كنت موجوده ما كان احد تكلم..
وبنتي الله يهديها صبته في اذون امي ,, والدنيا قامت وللحين ما قعدت .. ما عرف كيف اتصرف مع بنتي لي رجعت البيت .. مافي بالي غير ان اضربها .. لان الصراحه السالفه الوالده كبرتها وايد…بدون داعي…. والسبب بنتي ..
الي عندها حل تقولي لاني جربت كل طرق الكلام والتهديد والتحذير والثواب والعقاب والحلال والحرام ..
وما بقى الا تحصل ضربه عشان تعرف ان نقل الكلام خطأ وبنتي مو مثل اليهال ماشاء الله كلامها واضح ومفهوم.. وكأنك تكلم بنت كبيره..
افيدوني بسرعه الله يخليكم
ام جنى
طيب جربتي تمسكينها لحالها بغرفة وتصيرين جدية شوي بكلامك معها .. وتهددينها انك بتحرميها من شي تحبه لو سمعتيها قالت شي ..
احس الضرب بمثل هالموقف ما راح ينفع .. اخاف تروح تشتكي منك عند أهل ابوها ولا أهلك .. وتكبر المشكلة بزيادة .. !!!
الله يسهل امورك ويهديها
إن شاء الله الأمهات يفيدونا
حاوزلي ماتخليها تجلس مع الكبار واحاديثهم
تكون تلعب مع الصغار افضل واشغليها بالعاب الكترونيه مناسبه لعمرها
وماتخليها تروح لاي مكان بدونك او بدون مراقبه ابوها حتى لاهل زوجك
موفقه
لازم تهاوشينها علشان تعرف ان هالشي خطاء
وصدقيني راح تخاف بعدين
الله يصلحها انشاءالله ويخليها لك يارب
ربي يعينك و الله مررره صعبة وممكن بكذا تسبب مشاكل اكثر بس
الافضل انك تقولي لاهل زوجك ما يتكلموا قدامها لأنها طفلة و مابتفهم المزح من
الجد و كمان حاولي تخوفيها ان الله ما يحبها و مابيدخلها الجنة لو نقلت الكلام ،،،
اللي تسمعه …انتى حاولي انك تشاركينها في الكلام معاك ولاتطنشينها
ترى أغلب اللي في سنها زي كذا الله يصلحها ويهديها
انا بلاحظ ان القصه طريقة توصل المعلومة بطريقة غير مباشرة لطفلك
الا الضرب ابتعدي عنه لانه مايفيد بشي بالعكس بيخليها تعاند
اتمنى البنات يفيدونك اكثر ..