انا بعدني اتوحم ترا ما خلصت .. واتمنى انكم تساعدوني .. لأني بموت وانا ادور على طلبي ..
خاطري في كبة باللبن … :confused: ادورها من زمان كانوا يسوونها عندنا في الجامعة وبصراحة كان هذا الذ مكان كلته فيها .. ومن بعدها ما كلت شي حلو نفسها ..
والبارحة سرت مطعم اوتار هو مطعم سوري اتوقع وللأسف ما حصلتها عندهم ..
شوفوا انا من النوع الي ما احب الكبة المقلية يعني العادية .. بس احبها لو مع اللبن ومع عيش بشعرية بعد ههههههه
ياريت الي تعرف الوصفه او حتى وين اقدر اكلها تخبرني ..
ولو في خبيرة تسويها لي بالصور عشان اطبق يكون يزاها الله كل خير .. فكت الي حولي من ازعاجي من كثر ما اطلبها..
وان شالله ما تخيبون ظني
الكبة باللبن
المقادير
كيلو لحم مفروم
كوب برغل
بصلتان مفرومتان
ملعقة شاي ( فلفل أسود – قرفة – ملح )
اللبن
ملعقتين نعناع جاف
الحشو
نصف كيلو لحم مفروم
3 ملاعق طعام سمنة
ملعقة شاي فلفل اسود
ملح – هيل – صنوبر
زيت للتحمير – فصين ثوم
6 علب زبادي
ملعقتين طعام كورن فلور ( نشا )
الطريقة
ينقى البرغل ويغسل بالماء لمده 25 دقيقة
يتبل اللحم بالبهارات ويخلط مع البصل والبرغل ويعجن باليد جيدا
ثم يطحن بالمكينة ( مطحنة اللحم ) ويترك جانبا
يسخن الزيت ويضاف له البصل حتى يحمر ويضاف له اللحم المفروم والتوابل والصنوبر
ويترك على نار هادئة لمدة 20 دقيقة
تقسم عجينة اللحم الى قطع صغيرة ويخوض بالاصبع وتحشى بمقدار ملعقة طعام من اللحم
وتعلق من الاطراف جيدا وتقلى في الزيت .
خلطة اللبن :
يخلط الزبادي مع الملح والكورن فلور والثوم المدقوق ويوضع في الخلاط حتى يصبح سائلا
يوضع في قدر ويطبخ حتى يبدأ تضاف له قطع الكبة ونترك لمدة 20 دقيقة على نار متوسط الحراري
تسخن الزبدة ويضاف لها ملعقتين النعناع ونترك حتى تذبل تضاف الى الزبادي ونترك لمدة 5 دقائق
وتقدم ساخنة
الف شكر لج عزيزتي .. . بس ماعليج امر كبري الخط وغيري لونه تراني ماشوف ههههههه
وانا سويت بحث بعد في الجوجل وحصلت تقريباً نفس الوصفه هذه بس مع اختلاف طريقه عمل اللبن ..
بس مالتج اضبط لأن الي لقيتها بالنت يضاف للبن صفار بيضه وحدة وشكيت بالموضوع ..
بس عندي سؤال .. انا مستحيل اعرف اسوي الكبه بروحي ..
ينفع اشتري الكبه المثلجة مثلاً .. او مثلاً اطلب من مطعم يعطيني كبه مثلجة .. او حتى جاهزة للأكل ؟؟
انزين انا لو يبتها مثلجة … عشان احطها في اللبن .. لازم تكون مقلاية قبل ..؟؟ واللا محمرة في الفرن شوي .. واللا اضيفها نفس ماهي نيه في اللبن واتركها تستوي في اللبن ؟؟
اسمحيلي تعبتج
ورببي يسمح امرك
الله يقومك بالسلامة اختي
طيب ليش ما تريحي حالك وتروحي على الجامعة اللي كنتي تدرسي فيها وتوكليها هناك
طالما كانت عاجبيتك أريحلك من الغلبة لانك حامل
المشكله الجامعة ما يسوونها كل يوم … واصلاً المطعم سكر .. وخلصنا دوام ..
بس الحمدلله اليوم رحت كلتها هههههههه تعشينا في مطعم لبناني دلتني عليه ربيعتي والحمدلله كانت لذيذة .. وانا اكلها اتذكر وصفة السفيرة بالذات في اللبن وبالفعل نفس المكونات بالضبط ..
كبه يويين خخخخخخ
والله مشكله الحريم
الا وحام ودلع وما ادري شوو
هع هع هع
حريم اخر زمن
بس ان شالله بروح اشتري كبه جاهزة هاليومين وبسويها بروحي .. وان شالله تضبط وبصورها بعد
أفا مشتهيه الكبه و ما محصلتنها
بسوي و بوديك 
اختي ممكن تشتري الكبه جاهزو مثلجه تحصليها بالسوبر ماركت في ابوظبي انا مجربه اللي عند أبيلا لبنانيه حلوة
بعدين تججهزي اللبن
جيبي لبن روب عادي حطيه في الخلاط
مثلا جيبي كيلو لبن و حطيه في الخلاط مع ملعقتين نشا مذوبتنهن في ماي بارد و بعدين اضربيهم في الخلاط و بعدين على النار حتى يغلي
تقدري تحطي بهار مع اللبن اللي تحبيه
بعد قلي الكبه حطيها معاهم و الرز أكيد تعرفي تسوينه
اتمى اكون افدتك بطريقه سهله
