[CENTER] بسم الله الرحمن الرحيم
عزيزاتي و غالياتي
كلنا اكيد سمعنا عن ماركة .himalaya herbals
وهي ماركة طبيعيه و مكوناتها من الاعشاب
تنباع في الجمعيات ،، و أسعارها في متناول الجميع
من نزلت الخليج وانا بديت اجربها
وان شاء الله بذكر لكم كل الأشياء اللي جربتها مع المساوئ والمحاسن لكل منتج
نبتدي
كريم العنايه بالكاحل ينعم جداً ومع الأستخدام المنتظم راح تلاحظين ان التشققات بدت تختفي
يتكون من ::
العسل ،، كركم ،،زنجبيل ،، ملح
له سيئه وحده يمكن التغلب عليها وهي ان ريحته قويه و مزعجه
وانا تغلبت على هالشي اني اخلطه بأي كريم معطر احبه او احط عليه نقطة مسك ،، و ممكن تخلطينه مع رشة بودرة معطره.
ماسك الخيار و اللوز
ماسك مقشر يستخدم لجميع انواع البشره
المكونات :: اناناس ،، لوز ،، خيار ،، كزبره هنديه
يقشر و ينظق وينعم البشره
ماسك المشمش
وهو احلى منتج في هالماركه الى جانب كريم الكاحل
بجد لاحظت تغير في بشرتي من اول اسبوع و كنت استخدمه يومياً والحين كل يومين
يقشر البشره و يزيل الرؤوس السوداء والجلد الميت ،، بنظري افضل من الماسك السابق " ماسك اللوز والخيار"
تحطينه على الوجه والرقبه و تعملين مساج خفيف بأصابعج على شكل دوائر صغيره
المكونات: تفاح ،، مشمش ،، زيت
لا تخافون من الزيت انا بشرتي دهنيه وما زيد افراز الدهون عندي
الا بالعكس
وهو مناسب لكل انواع البشره وغني بفيتامين E
ماسك الجوز
نفس وظيفة ماسك المشمش ،، لكن بنظري ماسك المشمش افضل بكثير
واللي يفرق بالمكونات ان هذا فيه جوز بدال المشمش
والمشمش معروف افضل للسكراب
عبوة الطين
من اول المنتجات اللي استخدمتها من هالماركة
منظف عميق و يزيل الرؤوس السوداء
ينعم البشره ،، يطريها و يلينها
من احدى مكوناته الجوز الى جانب الطين الطبيعي
طريقة استخدامه خذي كمية متوسطه واخلطيها مع ماء وانشري طبقه رقيقه على كامل الوجه والرقبه
لكن كحال باقي الماسكات تجنبي منطقة العينين
اتركيه يجف لمدة 10 دقائق الى ربع ساعه
حتى انك راح تلاحظين انه نشف و بتحسين ان بشرتك شدت
بعدها تمسحينه بأسفنجه رطبه ،، واغسلي وجهكِ بماء بارد
واهم شي بعدها تستخدمين الكريم المرطب المفضل لديكِ
لأن هالماسك راح ينشف البشره شوي
نصيحه مني لكِ : اعتمدي على ماسك المشمش كل يوم اذا بشترك تحتاج او كل يومين لأنه مقشر ممتاز و خفيف على البشره و استخدمي ماسك الطين مره بالأسبوع
\وصلنا الحين للمستحضرات اللي ما حبيتها//
ممكن تكون فادتكم او راح تفيدكم لكن انا اكلمكم عن تجربتي
الشامبو و زيت الشعر نهائي ما ناسبوني
و مجموعة غسول الوجه و التونك و الميلك ما حبيتهم نهائي ومن اول كم مره تركتهم وارتحت لديور اكثر
اتمنى اني ما طولت عليكم ،، واتمنى انكم تستفيدون من تجربتي
بحاجة دعواتكم يالغاليات
اشكرك على المعلومات
انا بعد استخدم منتجات هالماركة
المقشر وعبوة الطين فعلا ممتازة هالماركة
اما بالنسبة للشامبو ما جربته بصراحة لاني استخدم نوع من الشامبوا وما حبيت اجازف واغيره
وكما قلت المنتجات هذه جدا ممتازة هذا بالنسبة لي انا
خساره بس شريته مع البلسم وتوقعته زين بس ….. من جد يسوي الشعر جاااااااااااف حييييل
وحبيت اضيف منتج زياده لأني نسيت احطه
وايد ارتحت له
مع اني جربت اكثر من نوع واغلبهم ماركات عالميه معروفه
لكن بالنسبه لي كان افضلهم
واللي شجعني اشتريه كلام اختي الغاليه ام سعيده عن فوائد الطماطم للبشره
كريم للعنايه الليليه وشوي عليه كلمة رائع
ينفع لكل انواع البشره
مكوناته:: الليمون التفاح ،، White Lily ،، والمكون الأساسي له هو الطماطم و هو غني بفيتامين E
:cool2::clap: مرحبا غاليتي ..
تسلمين على الطرح المميز والرائع
منتجات هملايا رائعة للبشرة والجلد وهي تعتبر علاج لمعظم مشكلات البشرة
بإنتظار ماسيجود لنا قلمك من جديد
تقبلي شكري وتقديري
ام عدول
عجيبة هالماركة الصراحة
تسلمين يا عسل ع المشاركة الرائعة
بس حبيت اسأل مافي كريمات نهار أو مرمم او اي شئ يجدد البشرة؟؟
تحياتي
انا جربت ماسك لازالة البثور ، من نفس الماركة وهو ابصراحة رووووووووووووعة
ويتكون هالماسك من نبتة النيم ( هو كاتبنها جذي) ومن الكركم )
واختي امجربة ماسك المشمش وابصراحة هي تمدحه ….
وشكرا …
واحسن شي انها طبيعيه مافيها مواد كيماويه ….
