بسم الله الرحمن الرحيم
السلام عليكم ورحمة الله وبركاته
حبيباتي وخواتي بنات عروس .. طلبتكم 
اتمنى من كل وحده منكم خواتي بدعوه بظهر الغيب
ان ربي ييسر خطبتي
ويرزقني كل اللي ببالي
ويشرح قلب اهلي على الانسان اللي اخترته
وهذا موضوع من بنات افكاري
اتمنى تستفيدون منه 
الشوكولا .. يا عيني ع الشوكولا
بصراحه انا احب الشوكولا موت موت
مثلي مثل كثير من الناس
فإذا كنتي مثلي .. شوفي هالافكار
ممكن تبهرين زوجج (او حتى اهلج) خصوصا بالعزايم باطباق الحلويات اللي من صنع يدج .. ويا كثر وصفات الشوكولاته
وممكن في قعداتكم اليومية .. او الخاصة
ممكن كهدية للايام العاديه بحد ذاتها
او تكون هدية مصاحبه لهدية رئيسيه
الافكار وايد ماتخلص
احط بين يدينكم هالكم صوره
طيب واللي مايحب الشوكولا ؟
او تملل ويبي يغير
اقول لكم الاختيارات وايد .. ومتنوعين
بس هالمره بقول فكره واذا شفتكم تحبون هالافكار يبت لكم غيرهم
طيب
ممكن تستخدمون المارشملو << حلوى البلعوم
ليش لا؟ فكره حلوة ومميزة مو منتشره كثير
(y)
مذكرة الاحداث السعيده، الحزينة .. والمضحكة
مره وانا اتسوق مع رفيجتي بمجمع .. طاحت عيني على مذكره حلوة واااايد
كانت مو مسطره من داخل .. ليوميات
وانا بطبعي اذا اشوف شي يعجبني تطلع عليه افكاري
ورفيجتي عكسي
المهم على طول قلت لها: (و هي مخطوبه .. كاتبه كتابها) ..
تحملي تفوتينها اخذيها حلوة وايد
ولما أي واحد يحس انه يبي يقول شي للثاني
سواء منحرج انه يقوله
او ممكن منحبط من تصرف سواه شريكه وهو مو موجود
او فرحان وايد وايد
انه يكتب شعوره بالضبط
وتكون المذكره في درج .. بس لما يكون فيها جديد تكون محطوطه برا على الرف او ما شابه
عشان الطرف الثاني يعرف انه فيها جديد
وهذي طريقه حلوة للي توهم متزوجين
تضربون فيها عصفورين بحجر
انكم توصلون مشاعركم .. وانكم توثقون لحظاتكم بتاريخا للذكرى في المستقبل
لا صرتي الصورة .. وعيوني البرواز .. شلون ابانسى
شلون تستفيدين من البرواز بطريقة غير تقليديه؟
هذي كمن فكره ..
وضع عقد الزواج او شهادات الاطفال صار شي تقليدي نوعا ما
طيب لو حابه تشوفين شي يذكرج بيوم زواجج غير الصور والعقد
ممكن تبروزين دعوة الحفلة ..
طريقه حلوة شفتها باحد الافلام الاجنبيه .. وان شاء الله اطبقها
ممكن توصين على نوع من الاطار يكون عريض
وتبروزين ثياب اطفالك او ربطات الشعر او القبعات او الجوارب لما كانوا صغار وتحطينهم بغرفهم
حركة حلوة وايد وايد
وانا عن نفسي ما صفيت الا على كمن شغله من ثياب طفولتي
وتمنيت لو ان امي حفظت لي شغلات اكثر
بس الحمد لله على كل حال .. وجودها ووجود ابوي يكفيني
ممكن تطبعين احاديث نبويه
او ابيات شعر تعجبج
او ادعيه .. واستغفار
أي شي
المهم انج تغيرين كل فتره الموجود بالبرواز
بشرط يكون البرواز حجمه مناسب مو صغير وايد
والخط اللي تختارينه جذاب وملون
وتخلينه في مكان حيوي بالبيت
بحيث ان كل اللي يمر عليه يقراه ويستفيد منه
وانا شخصيا افضل الادعيه والاذكار
لاننا ننساها احيانا .. فتصوري حلاوة انج تتآجرين وتكسبين اجر كل شخص معاج بالبيت
وتعلمين الاطفال انهم يستغفرون ويدعون ويذكرون الله على طول لما يشوفونكم فيسوون مثلكم
اعرف شيء عن كل شيء تصبح مثقفا
واعرف كل شيء عن شيء تصبح عالما
هذي مقوله احبها كثير فيما يتعلق بالقراءة
سبحان الله
اول كلمة من الوحي كانت اقرأ
وكثير من الناس للاسف مايعون اهمية القراء .. ومتعتها بعد
عودي نفسج انج تقرين في أي كتاب مفيد
وكل فتره تشترين او تستعيرين كتاب تزيدين فيه حصيلة المعلومات عندج
هالكتب كتبها اصحابها في شهور وربما سنوات
يعني هي حصيلة تجارب وخبرات
انتي ممكن تكتسبينهم في مده قصيره
وبهالشي تصيرين مثقفه في موضوع معين .. وكلما نوعتي المواضيع زادت ثقافتج وحصيلتج من المعلومات
طيب هي مو بس معلومات او خبرات
الا وهي اسلوب الكاتب نفسه
تتعلمين طرق الحوار وكلمات راقية وتقدرين تتناقشين في مواضيع مختلفه مع اناس مختلفين
بدل السوالف بس عن زواجج والطبيخ والموضه
بهالشي ممكن تكسبين اعجاب زوجج
يعرف ان زوجته مثقفه واهل انها تتناقش باسلوب راقي وبفكر نير وبمنطق بعد
( بدون تعجرف او مباهاه لان هالشي ينفر الناس من حولج واولهم زوجج )
وممكن عشان تتشجعين .. تشترين لج رف حلو
او مكتبه صغيره
تذكرج كل ما مريتي عليها بكتبج .. ولو كانت لج زاويه خاصه بالقراءه
فيها اناره حلوة .. وكرسي مريح .. وبمكان هادي بالبيت
راح تتشجعين اكثر واكثر ..
طبعا هالشي موضروري ولكن للي عنها سعه .. ومستحبه
هي فكره لا اكثر
سلسلة السياره – علاقة المفاتيح
احب اهدي هالهدية لكثير من الناس
السياره شي مهم في حياة الناس
وانا بطبعي احب اهدي اللي يعزون علي
واحب اكثر الهدايا الرمزيه اللي بدون مناسبه
احسها تفرح القلب اكثر
لانها مو متوقعه
اختاري ميدالية او علاقه حلوة للمفاتيح
بجذي راح ترافين اللي هديتيه بكل مكان تقريبا
وراح يتذكرونج بالروحه والجيه
بالنسبه للسلسله .. اللي تتعلق على المرآه اللي يشوف منها السايق السيارات الخلفيه << حاست الدنيا
ان شاء الله فهمتوا علي
اختاري أي سلسله حلوة .. مو شرط مخصصين للسيارات
محلات الاكسسوارات فيهم سلاسل انواع واشكال
اهم شي تختارين اشكال ناعمه .. وفيها كريستال << احبه
لان الكريستال مع نور الشمس يعطي لمعه حلوة وايد وايد
واذا تبين محل سوارافسكي عندهم تعليقات روعه على اشكال نجوم وغيره للسيارات
لمعتهم رهييييييييييبه .. اخذي لج فره واسألي عنهم
احس طولت عليكم
استحملوني
لا تنسوني من دعواتكم .. واهم شي الدعاء اللي قلت لكم عنه باول موضوعي
احبكم في الله
(f)
) دعواتكم لي إن اللّه ييسر لي زيارة بيته الحرام عاجلاً غير آجل اللي كل ما قلت خلاص راح أشوفه يتأجل الموضوع 
