السلام عليكم و رحمة الله و بركاته…
أسعد الله أيامكم بالخير عرايسنا الحلوين…
من فترة كنت أدور في النت على حلى هندي… و طحت على هذا الحلى اللذييييذ…
كلمة pista هندية و معناها فستق، و mithai معناها حلوى… و هالحلى أساساً كان بالكازو و الفستق، و جربته بالكازو بس الطعم ما كان مثل ما أبيه، فأقترحت علي أختي إني أجربه بجوز الهند… و فعلاً، طلعت النتيجة فتاكة :thumbs_up:
بسم الله نبدأ مع بعض…
لعجينة الفستق بنحتاج:
كوب فستق مقشر و غير مملح
نصف كوب حليب طازج
نصف كوب سكر بودرة
ملعقة كبيرة زبدة
أقل من ربع ملعقة صغيرة هيل بودرة
لون طعام أخضر
ملعقة صغيرة corn syrup و هذي صورته للي ما يعرفه…
أول شي ننقع الفستق في ماي دافي لمدة 3 ساعات، و نغير الماي خلال هالفترة من 3 إلى 4 مرات…
بعد ما ينقع الفستق نصفيه من الماي و نحطه في فرامة الأكل عشان نطحنه، لكن تأكدوا إن ما فيه قشور عشان ما تخرب عليكم شفرة الفرامة…
نبدأ نطحن الفستق و ممكن تزيدون له شوي بس من مقدار الحليب عشان ينطحن زين و يصير معجون…
في قدر صغير نغلي الحليب و السكر و الزبدة و الكورن سيرب مع بعض…
أول ما يغلي مقدار الحليب ننقله لقدر كبير مع مقدار الفستق…
و نبدأ نحرك فيهم على نار حامية في البداية عشان نسخن الخليط، بعدين نخففها لأقل من النص و نواصل تحريك… لازم ما تتركونها و لا دقيقة عشان ما تحترق، بتاخذ منكم تقريباً من ربع إلى ثلث ساعة تحريك…
في الأخير بتحسون الخليط ثقل و صار كتلة وحدة، الحين نضيف الهيل و نقطة وحدة من صبغ الطعام الأخضر… حركوا العجينة و إذا حسيتوها تحتاج لون زيادة، زيدوا نقطة بس لا تكثرون، نبي بس نطلع اللون الطبيعي للفستق…
نجيب صينية تيفال أو ورق سليكون و ندهنهم بالزبدة و نفرش عجينة الفستق عليها و نخليها تبرد لمدة ربع ساعة…
في هالوقت نجهز عجينة جوز الهند:
2 كوب جوز هند
كوب حليب طازج
4/3 كوب سكر بودرة
ملعقة كبيرة كورن سيرب
2 ملعقة كبيرة زبدة
بنشتغل بنفس الطريقة، الفرق إننا ما راح ننقع جوز الهند…
هنا خلطنا الحليب و السكر و الزبدة و الكورن سيرب اللي غليناه مع جوز الهند…
و نحرك بنفس الطريقة، لكن انتبهوا خففوا الحرارة أكثر لأن جوز الهند خفيف و يتغير لونه بسرعة، و احنا نبي اللون الأبيض الناصع 
و هنا بالصورة بعد ما تكونت عندنا عجينة متماسكة…
و نفردها بنفس الطريقة و نتركها تبرد…
إذا بردت العجينة و حسيتوها مو متماسكة، مكن ترجعونها عالنار مرة ثانية لحد ما تمسك و توصلون للقوام المناسب…
الحين نشيل العجينتين و نلفهم بورق نايلون و ندخلهم الثلاجة تقريباً نص ساعة عشان تكون متماسكة لما نشتغل عليها… و الغرض من دهن الصينية في البداية، إنه يسهل علينا نشيلها بعد ما تبرد بدون ما تلصق، خصوصاً إنها دبقة من السكر…
طبعاً ممكن تسوونها بالليل و تشتغلون عليها ثاني يوم… و عجينة المكسرات إذا لفيتوها زين و حطيتوها بعلبة بلاستيك، تقعد معاكم إلى أسبوع بدون ما تتغير…
الحين طريقة التجميع:
نجيب ورق النايلون و نفرشه عالكاونتر، و ناخذ عجينة جوز الهند و نقسمها نصين، ناخذ نص و نشكله بيدنا بشكل اسطواني، بعدين نحطه على النايلون…
مثل ما هو واضح بالصورة، نسكر النايلون على العجينة و نبدأ نفردها بشكل مستطيل بس ما تكون رقيقة كثير…
و ناخذ عجينة الفستق و نقسمها نفس الشي، و نشكلها باليد بشكل اسطواني بطول عجينة جوز الهند و نحطها بوسطها…
و صورة أقرب…
الحين بمساعدة ورق النايلون، نطوي عجينة جوز الهند على عجينة الفستق بنفس حركة السويس رول، و لازم أطراف العجينة تلتقي مع بعض، و إذا في شي زيادة شيلوه بالقطاعة الرول، نبي العجينة لفة وحدة بس و تكون متساوية من كل الجهات…
و هذا شكلها بعد ما لفيناها…
الحين لفوها زين بورق النايلون و شيلوها بحذر و دخلوها الثلاجة، نبيها تكون متماسكة لما نقطعها …
و نكمل شغل على النص الثاني بنفس الطريقة…
و بعد ما تبرد نقطعها بالحجم اللي تحبون… إذا حسيتوا هذي الطريقة متعبة و يبيلها وقت، ممكن تاخذون كورة صغيرة من عجينة جوز الهند، و تفردونها بيدكم و تحطون داخلها كورة صغيرة من عجينة الفستق و تسكرون عليها… هي الطريقة سهلة لكن بتتعبكم لأنها تلزق باليد…
و هذا شكلها بعد التقطيع…
و هذي صورة من الموقع اللي أخذتها منه، لكن هذي بعجينة الكازو… طبعاً لما سويتها ما طلع لونها أبيض مثل الصورة
و طبعاً لكم حرية إختيار نوع المكسرات اللي تبون… يعني ممكن تسوونها باللوز أو الجوز أو البندق… و انتوا اكتشفوا نكهات جديدة مثل ما سويت مع جوز الهند…
و بكذا نكون خلصنا و قدموها مع القهوة و ألف عافية و صحة على قلوبكم :L:
