الوسم: العسلي

فجأة لقينا في بيتنا قرع عسلي اخويا جابه وقالي نفسي اكله بالمكسرات
بصراحة انا اكلته مرة زمان ومش عجبني علشان كان محلي قوووووي وانا مش باحب السكريات الكتيرة :ss:
تفحصت في النت ولقيت الطريقة بسهولة بس برضه مش داخلة مزاجي طريقة البشاميل
قولت اخترع البشاميل الحلو +المهلبة وطلعت بصراحة جميلة وناوية احشي بيها القطائف بعد كده إن شاء الله
المهم علشان طولت ندخل في المضمووووووووووون 😉

(المكونات)
<لسلق القرع>
قرع عسلي كانت 2 كيلو او 2 كيلو إلا ربع

<مهلبية البشاميل >

1م.ك نشا أو 1وربع م.ك +1م.ك دقيق
مكسرات للحشووو

(الطريقة)
بتغسلي القرع كويس بالسفنجة وتنشفيها علشان لما تدخلي فيها السكنية مش تاخد من الكيماويات اللي على القشرة والجراثيم

1كوب لبن كبير (انا عملت لبن بودرة)+2م.ك لبن بودرة غير اللي عملنا بيهم اللبن 9م.ك سكر+1م.ص فانيليا

ونقطع القرع بالنص بالطول زي الكانتالوب (الشمام) وبعدين نخرج القلب ونرميه

ونقطعها شرائح بالطول ونقشرها

نقطعه مكعبات متوسطة ونحطه في الحلة اللي هيتسلق فيها ونرش عليها كل كمية السكر 9م.ك ونقلبها ونتركها نصف ساعة على جمب

نضع القرع على نار هادئة جدا ونغطيها بالغطا ونتركها حوالي نصف ساعة إلى أن يستوي بس مش يتهرى لا يستوي بس زي البطاطس المسلوقة بس اطرى سنة وهنلاقي ان القرع نزل مية كتير قووووي ويتسلق من غير ما نحطله ولا نقطة مية خاااااالص هو هينزل مية كتير جدا هتغطي القرع كله وهيستوي في نص المية اللي نزلها

نصفي المقدار كله ونحتفظ بالمية بتاعة السلق علشان هنعملو بيها المهلبية البشاميل الحلو ونترك القرع يتصفى براحته اوعي تضغطي عليها نهائيااااا ولحد ما يبرد
كمية العسل اللي نزلت من القرع حوالي كباية بالضبط

نبدأ بقى نجهزو مهلبية البشاميل الحلووووو
في نفس حلة السلق علشان بس مش تعملي مواعين بس تتغسل بسرعة وتنشف على النار وحطي فيها 1م.ك زبدة +الدقيق وقلبيها على النار لحد ما تبقى دهبي أغمق شوية من اللي في الصورة لان دي كانت لسة في البداية

بعدين ضيفيلها مباشرة كوبين
1/ كوب من (ماء السلق هيكون زي العسل+مذاب فيه 2م.ك لبن بودرة)
2/ ثاني كوب من (اللبن مقلب فيه النشا+الفانيليا)

واقلب بسرعة علشان الدقيق مش يكلكع واسيبه على النار مع التقليب لحد ما يبقى القوام زي المهلبية
وانتي لو بتحبي السكر كتير دوقي المهلبية لو محتاجة سكر ضيفي سكر بودرة علشان يدوب بسرعة، لكن العسل اللي نزل من القرع بيكون محلي قووووووي سكر مركز

نهرس القرع بالشوكة او الهراسة بس مش جامد يعني لان لما بيكون فيه حتت مش اتهرست بيديه ملمس جامد شوية بدل ما يبقى مهري خالص :ss:

نجهز صينية نحط فيها القرع انا استعملت بايركس وكانت وسط
بتحطي في الاول حوالي 3 ملاعق مهلبية من تحت علشان مش تلزق لانها هتدخل الفرن

بعدين حطي القرع وزعيه وساويه بظهر المعلقة
(ممكن تقسمي كمية القرع نصين وتحطي في النص بينهم المكسرات بس انا مش حبيت كده)

بعد كده رشي فوقيه المكسرات

(كان عندي زبيب+جوز هند+سوداني فقط لا غير 😉 ممكن تحطي اللي تحبيه طبعا)

وفي الآخر صبي البشاميل المهلبية عليها بالتساوي وساويها برضه بظهر المعلقة، بس امسحي ظهر المعلقة بالزبدة السايحة علشان تبقى سهلة معاكي، ولو من غيرها عادي

وده بعد ما نساويها

بعدين يكون عندك زبدة سايحة بالمعلقة حطي على وش البشاميل بس مش تكتري يعني لكن تحطيها علشان لما تتحمر في الفرن تحمر من الوجه
وممكن ترشي سكر بودرة علشان تاخد اللون برضه بس كده هتبقى محلية جدااااا

وتدخل في الفرن من الشواية فوق فقط علشان تتحمر وتوضع في الرف الوسطاني

نخرجها من الفرن ونسيبها تبرد
على فكرة هي مش محروقة بس الزبدة بتخلي لونها يبقى غامق مش اكتر
بس انا لقيت ان الاجزاء اللي مفيهاش زبدة بقت دهبي وجميلة فقولت بعد كده مش هاحط زبدة انا مكتفية باللي عملت بيها البشاميل بس هزود معلقة في التحمير لانها مدية طعم لزيز قوي للبشاميل

وبعدين ندخلها التلاجة ساعة كده تبرد تماما والبشاميل يسمك نفسه

وبس كده خلصنا الحمد لله

وده شكل الطبق بتاعي 😉

ودي الصينية

ومتنسوش بقى التقييماااااااات علشان انا عارفة إنها إن شاء الله هتعجبكم 😮 شوفتو الثقة هههههههههههه:wink: (f)